يظل عهدنه وياك

شعر منقول :

يسلطان الكلوب يظل عهدنه وياك

وتظل كلوبنه بهواك مفتونة

يظل دربك مسير ونزهه للعشاك

وشما ينزرع بالموت يمشونه

وتره درب المحبة بلا جمر مكروه

وبلا نار موحش لليسحكونه

صديت علدربك ما شفت رجلين

تمشي وكاع مامونه

شفت كلوب تزحف والمنايه تحوم

ورماح وخناجر حقد مدفونه

شفت جفوف تنزف بدرب الشوك

وشفت لوح الوفه من دم يروونه

شفت جلاد يبجي من الذبح تعبان

وشفت منحر ضحك من اليذبحونه

شفت جذع الصلب معرض لليحبون

وشفت مصلوب يتحده اليصلبونه

معوق شفته كاصدلك مشي يحسين

والصاحين ماكدروا يلحكونه

شاعر جان يتوجه على عود الموت

ويغصبهن غصب علممشه رجلينه

شفت جدمي يتسابق تدوي بيه النار

ويزيد العزم كلما يحركونه

شفت طفلة تبوس جفوف اليذبحون ..تتوسل... تكلهم علحب حسين ذبحونه